Skip to main content

Thihna chungchanga mizo te kan insawng bawl dan

Mizote nunphung leh khawsak dan hi puithuna nasa takin a tuam leh a phuar vel a ni a. Hei vang hian thihna chungchangah pawh an puithuin an la urhsun thei em em a ni. Mizote hian thihna hi an thih dan a zirin sawi dan hrang leh hming hran hran vuahin an lo thliar hrang vek hlawm a, chungte chu:-
Sarthi
Sarthi han tih hian vanduaina vanga chet sualna tawh vanga nunna chante sawina a ni. Sarthi ti a an sawite chu – sa-in a seh te, thing tlu leh lung lumin a delh te, kang hlum te, tui tla te, lum hlum te, mahni nunna lak vang te leh vanduaina dang dang avanga thi thut te hi a huam a. Hetianga thi an awm hian thli tleh ngei turin an ring a, chu chu Sarthli an tiṭhin a ni. Tin, vanah chhimbal tawi te in a zam reih ṭhin a, chutiang a chimbal a zam chuan sar a zam an ti a, khawiah emaw sarthi an awm ngei turah an ruat ṭhin. Mizoten thih dana an duh loh berte zinga mi a ni.
Sarthi an awm reng rengin a ruang chu kawngkapuiah luhpui lovin, kawmchar kawngka aṭangin an zawn lut kher ṭhin a, chuta ṭang bawk chuan an zawn chhuak leh ṭhin a ni. In chhungah zan riahpuiin lu an menpui ngai lova, eng hunah pawh thi se, thlan an lai nghal chuk chuk a, an phum nghal mai ṭhin a ni.
Sarthi hi thlaichhiah a thiang lo a. Sarthi phum zan chuan in tinah, pawn bangah chhawl an thiat ṭheuh va. A chhan chu sarthi thlarau khan mumangah amah zawnna hlang kha a zuar duh ṭhin a. Chu chu an lo lei chuan thihnaah an ngai a ni. Chutianga chhawl an thiah chuan kan thiang lo tihna a ni a, a hnartu atana tih a ni ṭhin. Sarthi an awm reng reng hian hna thawh chu thiang lovah an ngai a, an hrilh ṭhin a ni. Hrilh hi serh tih nen thu hmun a ni.
Sarthi thlan chu thlan dang kham zawnga laih ṭhin a ni a. K.Laldinpuii chuan tihian a lo sawi a, “Tun hma chuan sarthi reng reng chu midangte thlan laih loh angin laih a ni deuh kher ṭhin. Mualdung zui zawnga thlan dang laih a nih chuan mual vang zawngin an lai ṭhin. Hei hian chu thlan a phum chu sarthi a ni tih a tichiang nghal ṭhin” (Mizo Chin Dan Ṭhenkhat 51).
Raicheh
Nu in a nau neih vanga thihna a tawh hian raicheh an ti a. Nau hrin chhuah thei loh vanga a thihin emaw a nau chu hring chhuak siin a thih san emaw chuan raicheh tih hian a huam a ni. Tin, naute kha dam ṭha tak pawh ni se, a nu enkawltu tur ber a thih avangin dam chhuak zo chuangin an ring lo a, a nu ruang chu an delh hlum tir nghal mai ṭhin a ni. Hetianga thih hi hmeichhia ten an hlauh ber ṭhin thihna a ni a, rapthlak theih tawpah an ngai a ni.
Raicheh a thi an awm chuan hnathawh a thiang lo va. Hmeichhiaten raicheha thi an awm tih an hriat ve leh an hna laklawh em em lai pawh ni se an chawlhsan vat a. An hmui hun laite pawh an dah nghal vat ṭhin  a ni. Raicheha thi thembu te, thuamhnaw te leh an thil dang reng reng an hmang duh ngai lo a, an kawngvawn ngat phei chu an ṭih em em ṭhin a. Hmeichhe ṭhenkhat phei chu an ṭhutna hmunah pawh an ṭhu duh ngai lo. Chutianga an serh loh chuan anmahni anga an thih ve an hlau a ni ber.
Raicheha thi an awm zan chuan a thlarau a lo vak ang a, an in a lo lut palh ang tih an hlau a. An ina a lo luh loh nan tiin in tinin pawn lam kawngka biangah katchat emaw hnahchhawl emaw an thiat ṭhin a, kan thiang lo ve an tihna a ni a, chutianga an tih chuan mitthi thlarau chu rawn lut lo turah an ngai ṭhin a ni.
Hlamzuih
Nausen a pian aṭanga thla thum a tlin hmaa a thih hian hlamzuih an ti ṭhin a. Khaw hrang hrangah hlamzuiha thih dan hun an bithliah hi dang deuh zeuh awm ṭhin mah se, a tlangpui thuin thla thum tih hi an hman tlang lawn ber a ni.
Nausen chu a taksa a vawha a daih hnuin, chhun a ni emaw zan a ni emaw an phum nghal mai ṭhin a ni. A phumna tur kha inhnuaiah emaw hmun remchang laiah an buatsaih mai ṭhin a, tlangval laih kher pawh a ngai lo a, a thiang lo an ti zawk ṭhin a ni. Ṭhenawmpaho leh pa upa lam deuh te pun khawmin a phumna tur chu an lai mai ṭhin a ni. Nausen chu puanin fel takin an tuam ṭhin a. A nu hnute tui lapua a dawhin chu chu an hmuam tir ṭhin, a kut lehlamah artui an hum tir a, lehlamin buhfai an hum tir bawk ṭhin a ni. Chutianga an tih zawh chuan bellian deuh naute lenna awm tawkah khungin an phum nghal mai ṭhin a ni. Hetianga an tihna chhan hi an puithuna thil vang a ni a, Mizo-te Khawsak Phung tihah chuan heti hian a chhan leh vang a in ziak a,
(a) Lapuaa a nu hnute tui an sawr, a ka a an hnawh kha, a thlarau a dangro  huna a fawh atan an ti a ni.
(b) Buhfai kha a ril aṭam huna a ṭamhnem tura an ngaih a ni bawk.
(c) Artui kha, a kalna tur kawng a hriat loh pawhin, artui kha a hmaah a lum zel anga, mitthi khua a lum thlen pui ang ti a an suangtuah vang a ni (Tribal Research Institute 32).
Hlamzuiha thi chu ‘kan thi ru a ni e’ an ti a, ral pawh an hlawh ngai lo. Nu ho nausen lo ti thi tawhte leh thenawm nuten an thutpui let let chauh a ni. Mipa phei chu hlamzuih thihin an ṭap ngai lo tih theih deuh thaw a ni a.Hlamzuih thiha pa an ṭah hum hum mai chuan mawi lo an ti a, mak leh tuarzuau an ti a, patlinlohna ah an ngai hial ṭhin a ni. Ṭawngna mahah meikhu ur pawh ‘Hlamzuih ṭah chu nepte’ an lo ti hial reng a. A hringtu nu bak chu a ṭap ngai meuh lo tih theih  a ni awm e. Tin, mitthi dangte an awm a, a tuka thlan ṭhut an neih ṭhin ang hi a awm ve ngai lo a. Thlan ṭhut ahnekin pa phei chu feh ngei turah an ngai ṭhin a ni. Nu erawhchu a hnute tang awmin ni hnih khat awm chu thilmak luaah an ruat hran lo.
Phungzawl Thi
Phungzawl vanga mi a thih chuan, a phungzawl kha kai ve theih turah an ngai a, an hlau em em ṭhin a ni. A vuitute chuan thlan khura an zalha an thlak fel rual khan ‘ka hai’ an ti a, an han tlan chhiat san ham ham ṭhin. Chumi hnuah chuan thlanah bawk chuan an kir leh a, thlan chu an vur ta chauh ṭhin a ni. Hetianga an tih hian phungzawl chu kai ve lo turah an in ngai ṭhin a ni.
Lengtlawn
Mi tu emaw nupui pasal nei lo a, a tar thih chuan lengtlawn an ti ṭhin a. Hmeichhia pasal nei lo a tar thi chu tuthlawh ha nen an phum a, chu chu a pasal ve aia ngaih a ni. Hetiang tho hian mipa nupui nei lo a, a tar thih chuan hreiha nen an phum a, chu chu a nupui ve aia ngaih a ni ve bawk a ni.
Lenglai Thi
Nula emaw tlangval emaw nupui pasal neih hmaa a thih chuan lenglai thi an ti a. Lenglai thi chuan khawtlang a nghawr dan a dang bik riau ṭhin a, vanglai taka thi an nih avangin chhungte tan chauh lo, midangte tan pawh an uihawm bik em em ṭhin vang a ni.
Lenglai thite hi an ṭhian nula tlangvalte khan an theih ang tawka chawimawi an tum ṭhin a. Lenglai ngat thi chu an menpui hram hram ṭhin a ni. Thlan pawh thlan khur dang aia thuk bikin an laih sak ṭhin a. Kuangah pawh Lungkuang ngei an siam sak deuh kher ṭhin a ni. Lenglai thi thlan laihna ah hian fiamthu thawhin nuihza an siam ngailo a, a lo ti an awm pawhin valupain a khap hram hram ṭhin a ni. Ngui tak leh bengchheng pawh siam lovin, thlan an lai ṭhin a, a vuina ah pawh pawndum sinin thlan thlenga kal ve te pawh an awm bawk ṭhin. Lenglai thi hi an ngai urhsunin, an tuar em em ṭhin a ni.
Mipa Puitling Hmeichhe Pawl Hauh Lova Thi
Mipa, mi ang pangai ve si, nula ngai hauh lova thi chu an hmusit hle thung a. A thlarau pawh Zingvanzawlah Pawla’n vawikhat mai ni lovin, a sai nawn hialin an ring a. Chutia, Pawla sai nawn a pumpelh theih nan chuan a serhah hmeichhe sulhnu tihlan a ṭul a, an phum hmain hmeithai hovin a serh kha kuta sahriak hnawihin an zut sak ṭhin a. Chu chu a chhungte thin tih damnaah an ngai a ni. Mizo hla hluiah pawh hetiang hian an lo phuah hial reng a,
 "Lenlai sum lovin, di zawng ve rawh,
Thlafam chan niin thaiin an zut ang che", (34) tiin.
Tuaipheng
Mizo pi leh pute nunah khan sawi tur ting chuan tuaiphengte hi an lo awm ve a. Tuaipheng thi an awm chuan an ruang chu a zangthal zawng ni lovin, a khaikhup zawngin an zalh ṭhin a ni.
Mi Ina Thi
Mikhualnaah emaw mi ina va thih hi thil pawi tak leh thiang lo tlukah an ngai ṭhin a. A chhan chu in aṭanga ruang a chhuah reng reng chuan zulin a zui duh an lo ti ṭhin a. Hei vang hian khual khuaah mi a thih a, an mahni khaw lam pana an zawn naah  khua paltlang dawn se la, an chhungkhat lainate inah chawlhpui  mai lovin pumah an chawlh pui mai ṭhin a ni.
Mi in leh lova an thih chuan a thi chhungte khan in sil nan sial emaw a hu tawk cheng sawmli emaw an chawi a ngai a. Hei hi pi pute dan leh hrai a bet tlat an lo chin dan phung a ni.Mi lu lak chin hun lai pawh khan, an mi lu lak chu inah hawn mai lovin, pumah an thlen ṭhin a. An mual lam pui hnuah Sahlamah an khai ṭhin a ni.
Lal leh Pasalṭha te, Miṭha te Thih Ni
Lal leh pasalṭha te, miṭha vantlang chung lam te thihna hian khawtlang a nghawngin, a nghawrnghin ṭhin em avang te, an thih ni chu ropui taka an hman ṭhin vang leh an tawrhna leh an sunna a nasat ṭhin em vang te hian thih dan danglam bik huangah hian khung ve theih mai a ni awm e.
Pi leh pute huna miṭha leh vantlang chung lam a inngai te chuan, “Ka thi a nih pawhin sa thin leh lung hawn lo chuan ka thi lovang” (Mizo Chin Dan Ṭhenkhat 52) tiin an lo sawi ṭhin a. Hetianga an tih ṭhin hi Thlaichhiah an ti a, mitthi chuan an sa chhiah zawng zawng chu mitthi khuaah a hawn vek thei dawn niin an ngai ṭhin. Hengte avang hian inthlaichhiah hi an ngaipawimawh em em a. Inthlaichhiah lo va thih chu an hlauh ber pakhat a ni.
Hengtiang hi a nih avangin lal leh miṭha te thihni chu a ropui thei ang berin an hmang a, mitthi a te chawimawina ni a tan an hmang a ni ber awm e. Inthlaichhiah nan khan sial bakah ran lu kim an talh bawk thin a. Zu an inin, an zuk a, tlai leh puar takin chaw leh sa an ei ṭhin a ni.
Ṭahtu ngah chu ropuinaah an ngai a. Ṭahtu ngahte chu an ngai ropui leh zual ṭhin. Mi neinungte chuan darkhuang te, darbu te, silai te an lo nei nge nge a. Chung an thil neih te chu an thih ni chuan la chhuakin darbu chu an tum hluah hluah a, darkhuang chu an tum vu hluah hluah reng bawk a, a khat tawkin silai an kap dur dur ṭhin a ni. Lal thih ni phei chuan khaw chhunga silai awm zawng zawng chu khawmin an kap dur dur ṭhin a ni.
Lalthangliana chuan thangchhuahpa leh pasalṭha ti an sawngbawl dan chu hetiang hian a lo sawi a,
 ''Thangchhuahpa a nih chuan Thangchhuah puan ṭial an sintir a. Thangchhuah diarṭial an khimtir a. A bengah ṭhi mal an behtir a, a sam zialah vakul chang buk luaia siam chu ropui leh mawi takin an tawntir ṭhin a ni.Pasalṭha a nih chuan a bungraw pawimawh silai te, fungki te an kentir a. Pasalṭha a nihzia lang thei ngei turin an cheibawl ṭhin''.(Mizo Culture 112&113).
Khuaa mi ropui leh langsar bik, an duhsakna sang hlawh tham khawp mitthi te chu thlan awmthleng vela thuka an lai hnuah, thlan chhak chu ruang lengin an ker puk a. A chhuat, a bang leh a chung lam zawng zawngah chuan lung chang phek an rem chhuak dap a, chu tah chuan ruang chu an zalh ta thin a, phui takin lung phek bawkin an chin leh ṭhin a. Hetiang thlan hi Tianhrang thlan an ti a, dan naranin chhungkuaa pa ber a thih chuan  phum nan an hmang deuh kher ṭhin a ni. Lal thi chu dan naranin kuangah an ur tlangpui a. Kuang ur hi a hautakin mi nazawng tih chi a ni lo a, lalte tih chi chauh a ni ber awm e.
Heng a chunga kan han sawi tak hrang hrangte hi Mizoten thih dan danglam bik leh an puithuna thilte avanga an lak urhsun leh an ngaihpawimawh em em thilte an ni a. A sawngbawl dan leh ser dan thlengin dan ṭha tak leh kawngkal fel tak neiin an lo kal pui ṭhin a ni. Mizote hian thihna hi an pal zut mai mai loh tih a chiangin an phak ang tawk tawkin an lo inṭawiawm a, an in sunpuiin an in tawrhpui em em ṭheuh a. An theih na zawnah ṭheuh in puihbawmin an lo inchhawmdawl liam liam ṭhin a lo ni.
Khawharin len leh riah pui
Mizo te nun a pawimawh leh Mizo nih ti nuam tu ber,tlawmngaihna lan chhuahna awlsam ber khawhar in len leh riah hi,tun hnu thleng pawn la chhawm chhoh zel ania,awmna(region) a zir in a tih dan leh hun erawh a in ang lo thei viau awm e,kum tam tak kal ta ah kha chuan tih dan ang khat tlang hmangin,zan thum len leh zan sarih a cham thleng riah pui kha ani thin a,mahse tunhnu ah erawh hmun tam zawk ah chuan,mitthi tlaivar ngai chu a tlaivar zan bak ah zan hnih len pui ani ta a,khawhar in riah pawh zan sarih ni tawh loin zan thum ani tawh a,hmun then khat ah erawh khawtlang in kaihhruai dan in hmanlai ami kha la chhun zawm zel ani a,chhun zawm zel tlak pawh ani a,ban san lo hram tur leh thang thal zel a vawng nung zel tur a kan inbuatsaih a pawimawh.
Bo zawn chungchang
Mi a ram kal naah ani emaw,lui kalnaah haw lo,tui tla ani emaw,in chhung ten zawng ngai ti ta ang se,a khawnawt a  nisarih thleng inzawn pui thin ani.chuta anla hmu lo anih chuan a aiah sa emaw thil dang phumin vui thin ania (hei bik hi chu ruang bo zawnah),mi chin hriat loh a a bo nih chuan nisarih hnuah chuan a chhung te an beidawng lo anih pawhin a run pui anga zawn an nei tawh lo a,tlawmngai zual leh chhungte hnaivaiin an chhunzawm tawh mai thin ani.
_________________________________________________
Works Cited
Lalthangliana, B. Mizo Culture. F.Vanlalringa; Saron Veng, Aizawl. Gilzom Offset, A-54 Electric Veng, Aizawl. 2013.
Laldinpuii, K. Mizo Chin Dan Ṭhenkhat. Tribal Research Institute; Art & Culture Dept, Aizawl. Lois Bet Print & Publication, Chanmari, Aizawl. 2013.
Tribal Research Institute. Mizote Khawsak Phung. Tribal Research Institute; Aizawl. The G.M. Printing Press & Block Making Industry, Venghlui, Aizawl. 1993
Bibiography

Comments

Popular posts from this blog

A THU THUHRUK

A tawngkam thlum leh nem diai chu hriat anuam ani satliah lo a,a cham hian a cham reng zawk ani.A sawi reng reng dawt a tel ngai lo a,a hmui chu thu dik loin a ti bawlh hlawh hek lo,ka tan thu tha a ui  ngai lo a,min zilh nan a hun lah a ui hek lo.Hmeichhe awm nem zawk ni mahse a rilru chu a paukhauh tlat si,a hmel leh pian chu sawi loh a lum ani a,a chhung ril mawina hian a khuh a ni ber mai.    A sawi fo leh ngaih pawimawh emem chu Rinawmna hi a ni a,a sawi reng a a sawi bang ngai hauh lo.Hmangaihna ah chuan rinawmna hi a pawimawh em em a,dam chhung  a awm dun tur chuan rinawmna neih angai a,chu rinawmna tel lo chuan hmangaihna a  famkim theilo a,a par vul thei hek lo,a kuh mum a a vul hmain a vuai in a chuai leh nge nge thin.chu rinawmna nei tur chuan mi nghet leh mihuaisen nih angai a,buaina leh thlipui lo hrang chang pawhin lungpui ang mai a din reng angai thin,hmangaihna kawng ah chuan hmelma an awm lo thei lo a, chu tiang karah pawh huaisen taka in rintawnna nen beih dun anih

RAMHUAI RIAH RUN

An sawi thin ramhuai thawnthu leh chanchin,Film leh lehkhabu ah te kan hmuh fo tawh ramhuai te hian awmduhna leh tlat bikna an nei ve tlat nia mawle.Mak ve tak mai   chu ramhuai leh thlahrang hi a dang an tih hi.Ramhuai te hian pianzia fel tak zu nei ve tlat a,hmel hlauhawm puipui pu leh mihring hmel ang tak pute pawh an awm nawk bawk a,chet dan hrang hrang nei an awm leh a,thenkhat   thawm hlauhawm siam thiam emem te,thenkhat rawn in lar zawk a bo leh mai thin te,then khat awmna ngai a, ngawi reng a awm reng te an awm leh a. Vawikhat chu Skul kan kal laiin,zanah lehkha zirtur in class room ah kan thu thap tawh a,zirtirtute lo kal hma thian ho kan titi hlim emem lai chuan, kan Skul chhak lawk a kawng ah chuan kan Sir,  kal thawm ni awm tak ri hi kan hria a,kan Sir anih ringin kan zirna room ah bak lengin kan tlan a,mahse darkar a liam hnu pawn kan Sir hmel rengreng alo lang silo,Room khat ah chuan kan lut leh thap a,rilru ah chuan helai hmun hi tun hma in ramhuai an awm thin tih

TLAI NI TLA TUR

Tlaikhua alo ngui chang hian,ka ngaizual thin hmanlai chang hnu a liampui leh si hlimlaini zawng te let leh lo turin