HMANLAI

Zingtian baw-ar lo zaiin

Khuavel a eng leh ta

Turni thangvan lo kai e

Thlangtiang a liam turin

Zing ani a boruak a thiang kher mai,khua chu avar tawh a mahse mihring erawh hmuhtur an la awm meuh lo,Ar chhiar atang chuan ar pachal khuang leh ar nu dawk daw lak chu a in dawt zut a,ral khat atang  chuan uicho alo bauh lauh lauh bawk a,kawngkhar chu a rawn in hawng ri rak a,naupang tap thawm leh tukverh in hawng ri chuan veng chhung a luah a,intin chung chu thli chhem ni siloin meikhu zam chuan a ur phe hleuh hleuh a,tual chu naupang in an khat ani ber a,tuikhur kawng pawh areh mawlh lo,nula tlangval inchhaih leh nui  thawmin a khat ani ber  a,inchhung lamah chhung nu ber ang hlawp hlawp chung a eirawngbawl pahin,leh lamah pa ber in thenrual kawmin ti ti a lo vawrh bawk a,Pitar,Putar thingpui hang ngen lah bo lo nuber lu chu hai lo zia zang chi ani lo,tukthuan tur siam mek chauh ani tih hre chang lo naupangin anu ka ril tam an ti chhen phei chu  nu tan chuan ka sim tih vawng vawng natham ani ngei ang.mahse chung hun chuan min liam san tan mek tasi,tuk a chhuah a khawiteh kawmthlang pa ka han kawm teh ang titu pawh an dang zota,an awm tawh meuh lo,veng lu leh mawng dap a thenawm te kan thin pa pawh kha an awm tawh meuh  lo,a then chu leilungah an ral tawh a,a then erawh lai tha reng zam tawh loin laikhum ah an zal ta si,

Turni her sang zelin vanlaizawl  ah

Muangten thang vanrang chhum lo zam e

Chhimthlang chhemdam thli leh

Luite tui luang ri dam  dam nen,

Tuk thuan eikham chuan mahni lo lam panin lo kawng chu a ri thla nak nak a,thu dang vawrh ta lem lo chuan,'ka lo a kang tha lo ang' tih chu mitin titi ani a,tuium leh chaw fun, ipte pui a ak chungin hlim tak leh nui sang chung in an hma lam chu an pan a,hah thei lo ang maiin ani tin hun hman dan ah an vui chuang lo a,an tih tur ani tih hriain nitin hlimtakin an tum lam an pan mai zawk ani,mahse hman lai ala chang a nga,chul ram ani dawn tih chu an ngaihtuah ngai hauh lo,I ngaihtuah ve ngai em aw?khang hun laikha tunah chuan a  dang zo ta,lo nei peih pawh an khat ta pharh mai,

Ri in tawmte pawh an dang ta,thenkhat pialleiah then khat lai khum ah mittui nen hun an hmangta si,mitthla ah alang a hlimthla mai bak a ni tawh silo chen leh chak in auhkir tum mahila a theih tawh siloh lunglenna leh mittui bak a chhuak silo mittui chuan chu hun chu a chim lang pha tawh mawlh lo zawng anih hi…

                                                                  Thlangtiangah turni her liamin

Zawh za zo pa kir zai rel e

Lamlian sir ah thereng hram  e

Khauchher kiu nen.

Ni lah tak a,ni tlangah aliam a khua a han thim dawn hi chuan lo a feh te  chuan phur siamin mahni in lam pan zai an rel a,in lamah fate chauh an awm ani tih ngaihtuah tu nu chuan chauh pawh hre lo ang maiin a phurchhu a siam thuai thuai a.Pa ber lah eng ngaihtuah bak sak suh Ip te pui ah an tel hnih leh chemtum ak in nu ber chu a chhawm chho a,chu tih lai chuan feh ve dang  te pawh chu an in zui haw nak nak a,lo kawng chu areh lo kher mai,kawng sir tawn tawn atang chuan losul haw thereng leh khauchher chu an lo kiu bawk a.Va hleisawt lo sawt keuh keuh leh thehlei lo te te chuan zan lo thleng tur chu an huphurh ve ngei ani chek ang chu,Khuachu a thim deuh tawh bawk a In ah chuan naupang te chuan arte lawiin an lo um chiap nak nak bawk a,thlang lam ah vawkpui lo te nen khua chu areh lo ngei  mai,Naupang riltam rakri nen bengah hian ala cham reng thin,mahse khang hun kha chu hunin aliam pui tan mek chu ani si a,changkanna hian thangthar nun ati dang lam zo a,khang hun hrehawm viau alang si hlim awm ru tak si kha leidam chhung hian tawng leh tak ang i maw?

Hun liamtur thlirin mittui far mahse

Chelh din rual loh hmanlai chang tur

Au in ngai mah ila,a her leh dawn silo

Khuarei pawhnise  hlimthla bak kan hmu dawn silo

Ani tak a sin khang hun te kha au in koko mahila  mitthla ah bak an lang pha tawh dawn si lo a,khua  reiah chuan hmanlai tiin ngai takin kan la lam thin anga,chung hunah chuan khang hun lai a hringmi la chang then khat te kha chu pialleiah hmuh leh tawh ngai loh turin an zal tawh anga,a then chu khumah mittui nen thatlai nun chhuiin an nun vui la ni mai tur an sun mek bawk anga,thenkhat erawh thangthar khawvel ah pheikhai rual lo zetin hringnun an chhiar chho anga,khawvel danglam zel ah hman lainun ngaiin an la kiu vawng vawng anga,a tlang leh mual dang silo  chu lunghnur zet a thlir dauh dauh  in,hringnun mak zia an chhui  kir vawng vawng tawh anga,a mittui chu a hru hul seng lo ang.